Лоиқ_3

1 2 3

СУРУДИ НЕКӢ

Дунёи савдо бигзарад,

Андӯҳи дилҳо бигзарад,

Ҳам навбати мо бигзарад,

Аммо ба зери осмон

Ҳамчун замини бекарон

Некӣ бимонад ҷовидон.

Сад баҳр хушкад дар назар,

Сад боғ гардад бесамар,

Сад роҳ монад беасар,

Аммо ба сад рамзу нишон

Чун офтоби дурфишон

Некӣ бимонад ҷовидон...

Чандин макон дигар шавад,

Чандин замон дигар шавад,

Чандин ҷаҳон дигар шавад,

Аммо ба ёди одамон

Чун қуллаи Боми Ҷаҳон

Некӣ бимонад ҷовидон.

1984